Xeyr. Ümumdünya Səhiyyə Təşkilatı (ÜST) ilk 6 ayda körpələrə su verilməməsini tövsiyə edir. Tərkibinin təxminən 88%-i sudan ibarət olan ana südü və ya süni qida (formula) körpənin bütün maye və qida ehtiyacını tam qarşılayır.
Niyə su verilməməlidir?
- Əlavə su körpənin kiçik mədəsini doldurur və qidalanmanı azalda bilər.
- Körpənin böyrəkləri hələ tam inkişaf etməyib. Artıq su bədəndə elektrolit balansını, xüsusilə natrium balansını poza bilər və nadir hallarda su zəhərlənməsinə səbəb ola bilər.
Çox isti havalarda da su lazım deyilmi?
Çox isti havalarda belə ana südü ilə qidalanan körpəyə əlavə su verməyə ehtiyac yoxdur. Körpəni daha tez-tez əmizdirmək kifayətdir.
Su nə vaxtdan verilə bilər?
6-cı aydan sonra, əlavə qidaya keçidlə birlikdə suyu tədricən və az miqdarda təklif etmək olar. Bu dövrdə körpədə gündəlik kiçik qurtumlarla su içmə vərdişini formalaşdırmaq məqsədəuyğundur.
İstisna hallar
Yüksək hərarət, şiddətli ishal kimi hallarda su və ya elektrolit məhlulları yalnız həkim tövsiyəsi ilə verilə bilər.
Şirin su sarılığı azaldırmı?
Xeyr, bu geniş yayılmış yanlış fikirdir. Şirin su körpənin bağırsaq mikroflorasına zərər verir və sarılığı keçirmir. Ətraflı: Yenidoğulanlar haqqında yayılmış yanlış fikirlər.
Uşağınızın sağlamlığı ilə bağlı sualınız var?
Dr. Günay Hacızadə Sağlam Ailə Tibb Mərkəzinin Nərimanov filialında qəbul edir.